民建联四大长老讲「一带一路」

nibudongde

民建联「四大长老」曾钰成、谭耀宗、叶国谦、陈鉴林（橄榄），告别立法会议员生涯后，相对清闲，有咩新搞作呢？民建联Facebook寻日上载短片，橄榄请咗三位「长老」一齐饮茶吹水。谭sir问橄榄，上次有冇嚟打麻雀，佢话无，曾主席就立即润佢话，橄榄挂住搵钱唔得闲打牌，橄榄幽默回应：「赚钱支持民建联」，又话「呢啲叫做发展经济、共享繁荣」。无见一排，橄榄仍然咁生鬼。

　　「四大长老」跟住讲到「一带一路」。前特首梁振英喺施政报告多次提及「一带一路」，希望香港人多啲把握机遇，曾主席、阿谦都话，其他国家一直好关心「一带一路」嘅发展。曾主席话，自从梁振英讲完之后，匈牙利政府立即邀请立法会议员去匈牙利访问，仲问主席有关「一带一路」嘅问题。阿谦都话，旧年去俄罗斯莫斯科，当地年轻人亦都好紧张「一带一路」嘅发展。睇见香港反应冷淡，橄榄就建议，希望有一个平台可以畀企业同市民参与，加深大家嘅了解。郑晴亦都有一个建议，年轻人咁钟意去旅行，应该把握学校嘅考察团或交流机会，或者直接去「一带一路」国家旅游，多啲了解，咁样先有发展机遇嘛。