林郑月娥衣品不错

多蓝

　　林鄭月娥衣着品味向來獲得好評，鄭晴覺得佢尋日以一身米白色套裝作為戰衣，完全突顯到佢嘅優雅大氣！真係簡約而不炫目、美麗而不浮華。曾為陳慧琳、郭富城等明星擔任形象顧問嘅張學潤（Nelson，昵稱Nel Nel），對林太呢身造型，讚話打扮清新自然，而且用珍珠作為首飾配搭，十分得體，「睇得出佢打扮時，知道咩係啱自己」。

　　林太近年偏愛着旗袍，連耳環、鞋都係襯到絕，Nel Nel話，旗袍容易畀人感覺老氣，林太尋日以套裝示人，增加專業感，而且更容易畀人接受，喺呢種場合着一定唔會出錯！難怪世界上咁多女政客都會以套裝示人啦！套裝設計一向講究Cutting（剪裁），Nel Nel話，林太尋日條裙下擺就好似闊咗啲，如果更加修身就Perfect！

　　至於妝容方面，林太都係行清新路線，鄭晴覺得林太唇妝部分最正，顏色類近超Hit嘅豆沙色，增加氣色時，又唔會過分搶眼，搞到鄭晴都考慮緊，今個月出糧後都買返支同色系唇膏！